ਡਾਇਰੈਕਟਰਾਂ ਦੇ ਰੋਸ਼ ਦੇ ਬਾਵਜੂਦ ਗੁਰਦੁਆਰਾ ਨਾਨਕਮੱਤਾ ਸਾਹਿਬ ਕਮੇਟੀ ਦੇ ਪ੍ਰਧਾਨ ਚੁਣੇ ਗਏ ਸ: ਹਰਬੰਸ ਸਿੰਘ ਚੁੱਘ, ਜਾਣੋ ਕੀ ਹੈ ਪੂਰਾ ਮਾਮਲਾ

ਨਾਨਕਮੱਤਾ । ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਚੋਣ ਪ੍ਰਕਿਰਿਆ ਪਿਛਲੇ ਕਈ ਦਿਨਾਂ ਤੋਂ ਚੱਲ ਰਹੀ ਸੀ ਜੋ ਕੱਲ੍ਹ ਸਮਾਪਤ ਹੋ ਗਈ। ਜਿਸ ਵਿੱਚ ਸੇਵਾਮੁਕਤ ਆਈ.ਪੀ.ਐਸ ਅਧਿਕਾਰੀ ਸ: ਹਰਬੰਸ ਸਿੰਘ ਚੁੱਘ ਨੂੰ ਪ੍ਰਧਾਨ ਨਿਯੁਕਤ ਕੀਤਾ ਗਿਆ।ਇਸ ਦੌਰਾਨ ਚੋਣ ਪ੍ਰਕਿਰਿਆ ਤੋਂ ਅਸੰਤੁਸ਼ਟ ਕੁਝ ਡਾਇਰੈਕਟਰਾਂ ਨੇ ਨਵੇਂ ਚੁਣੇ ਪ੍ਰਧਾਨ ਸ: ਹਰਬੰਸ ਸਿੰਘ ਚੁੱਘ ਅਤੇ ਚੋਣ ਕਮਿਸ਼ਨ ਖਿਲਾਫ਼ ਧਰਨਾ ਦਿੱਤਾ ਅਤੇ ਨਾਅਰੇਬਾਜ਼ੀ ਵੀ ਕੀਤੀ।

ਦੱਸ ਦੇਈਏ ਕਿ 25 ਮਾਰਚ ਨੂੰ ਕਰੀਬ 1400 ਗੁਰਦੁਆਰਿਆਂ ਵਿੱਚੋਂ ਚੁਣੇ ਗਏ ਡੈਲੀਗੇਟਾਂ ਵੱਲੋਂ 27 ਡਾਇਰੈਕਟਰਾਂ ਦੀ ਚੋਣ ਕੀਤੀ ਗਈ ਸੀ।ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਇਨ੍ਹਾਂ ਡਾਇਰੈਕਟਰਾਂ ਦੀ ਚੋਣ ਕੀਤੀ ਜਾਣੀ ਸੀ।

ਕਿੱਛਾ ਤੋਂ ਚੁਣੇ ਗਏ ਡਾਇਰੈਕਟਰ ਸ: ਨਿਰਮਲ ਸਿੰਘ ਹੰਸਪਾਲ ਨੇ qtv ਪੱਤਰਕਾਰ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ 27 ਡਾਇਰੈਕਟਰਾਂ ਦੀ ਹਾਜ਼ਰੀ ਵਿੱਚ ਚੋਣ ਕਰਵਾਉਣ ਸਮੇਂ ਇੱਕ ਪਾਸੇ ਵੱਲੋਂ ਚੋਣ ਅਧਿਕਾਰੀਆਂ ਨਾਲ ਰਲ ਕੇ ਵੱਡੀ ਗੜਬੜੀ ਹੋਈ ਹੈ। ਉਹਨਾਂ ਨੇ ਦੱਸਿਆ ਕਿ ਕਿਸੇ ਇੱਕ ਵਿਅਕਤੀ ‘ਤੇ ਸਹਿਮਤੀ ਨਾ ਹੋਣ ਕਾਰਨ ਦੋ ਧਿਰਾਂ ਬਣ ਗਈਆਂ ਸਨ ਅਤੇ ਉਨ੍ਹਾਂ ਨੇ ਚੋਣ ਅਧਿਕਾਰੀਆਂ ਤੋਂ ਮੰਗ ਕੀਤੀ ਸੀ ਕਿ ਗੁਪਤ ਬੈਲਟ ਪੇਪਰ ਰਾਹੀਂ ਚੋਣਾਂ ਕਰਵਾ ਕੇ ਪ੍ਰਧਾਨ ਅਤੇ ਸਮੁੱਚੀ ਕਮੇਟੀ ਦੀ ਚੋਣ ਕੀਤੀ ਜਾਵੇ ਪਰ ਚੋਣ ਅਧਿਕਾਰੀਆਂ ਨੇ ਇਸ ਗੱਲ ਤੇ ਕੋਈ ਗੋਰ ਨਾ ਕਰਦੇ ਹੋਏ ਦੂਜੇ ਪਾਸੇ ਜਾਅਲੀ ਹਲਫਨਾਮੇ ਤਹਿਤ ਕਮੇਟੀ ਦੀ ਚੋਣ ਕੀਤੀ ਹੈ, ਜਿਸ ਦੀ ਜਾਣਕਾਰੀ ਦੂਜੀ ਧਿਰ ਦੇ ਡਾਇਰੈਕਟਰਾਂ ਨੂੰ ਨਹੀਂ ਦਿੱਤੀ ਗਈ।ਉਨ੍ਹਾਂ ਦੱਸਿਆ ਕਿ ਇਸ ਫਰਜ਼ੀ ਕਾਰਵਾਈ ਨੂੰ ਦੇਖਦਿਆਂ ਉਨ੍ਹਾਂ ਚੋਣ ਦਾ ਬਾਈਕਾਟ ਕਰ ਦਿੱਤਾ ਅਤੇ ਬਾਕੀ ਡਾਇਰੈਕਟਰਾਂ ਨੂੰ ਨਾਲ ਲੈ ਕੇ ਬਾਹਰ ਆ ਗਏ ਅਤੇ ਗੇਟ ਦੇ ਬਾਹਰ ਧਰਨਾ ਦਿੱਤਾ। ਉਹਨਾਂ ਨੇ ਦਾਅਵਾ ਕੀਤਾ ਕਿ 27 ਡਾਇਰੈਕਟਰਾਂ ਵਿੱਚੋਂ 13 ਨੇ ਚੋਣ ਦਾ ਬਾਈਕਾਟ ਕੀਤਾ ਅਤੇ ਇੱਕ ਡਾਇਰੈਕਟਰ ਨੇ ਆਪਣੀ ਨਾਮਜ਼ਦਗੀ ਵਾਪਸ ਲੈ ਲਈ। ਜਦੋਂਕਿ ਜਿੱਤ ਲਈ 14 ਡਾਇਰੈਕਟਰਾਂ ਦੀ ਲੋੜ ਸੀ ਅਤੇ 1 ਵਿਅਕਤੀ ਨੇ ਫਾਰਮ ਵਾਪਿਸ ਲੈਣ ਤੋਂ ਬਾਅਦ ਦੂਜੇ ਪੱਖ ‘ਚ ਸਿਰਫ 13 ਡਾਇਰੈਕਟਰ ਹੀ ਰਹਿ ਗਏ ਸਨ ।ਦੂਸਰੀ ਧਿਰ ਨੇ ਧੋਖੇ ਨਾਲ ਚੋਣ ਜਿੱਤੀ ਹੈ।ਉਨ੍ਹਾਂ ਕਿਹਾ ਕਿ ਅਸੀਂ ਇਸ ਦੇ ਖਿਲਾਫ ਅਦਾਲਤ ਵਿਚ ਜਾਵਾਂਗੇ।

ਇਸ ਦੇ ਨਾਲ ਹੀ ਸਾਬਕਾ ਪ੍ਰਧਾਨ ਜਸਵਿੰਦਰ ਸਿੰਘ ਗਿੱਲ ਨੇ ਪਹਿਲੇ ਕਾਰਸੇਵਾ ਮੁੱਖੀ ਰਹੇ ਬਾਬਾ ਤਰਸੇਮ ਸਿੰਘ ‘ਤੇ ਦੋਸ਼ ਲਾਉਂਦਿਆਂ ਕਿਹਾ ਕਿ ਇਹ ਸਭ ਕੁਝ ਬਾਬਾ ਤਰਸੇਮ ਸਿੰਘ ਦੇ ਇਸ਼ਾਰੇ ‘ਤੇ ਕੀਤਾ ਜਾ ਰਿਹਾ ਹੈ | ਉਹ ਗੁਰਦੁਆਰੇ ਦੀ ਵਾਗਡੋਰ ਆਰਐਸਐਸ ਦੇ ਹੱਥਾਂ ਵਿੱਚ ਦੇਣਾ ਚਾਹੁੰਦੇ ਹਨ।ਉਨ੍ਹਾਂ ਮੁੱਖ ਮੰਤਰੀ ਪੁਸ਼ਕਰ ਸਿੰਘ ਧਾਮੀ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਉਹ ਇਸ ਗੁੰਡਾਗਰਦੀ ਨੂੰ ਖਤਮ ਕਰਨ।

ਡਾ: ਦਲਜੀਤ ਸਿੰਘ ਨੇ ਕਿਹਾ ਕਿ ਨਵੇਂ ਚੁਣੇ ਗਏ ਪ੍ਰਧਾਨ ਨੇ ਚੋਣਾਂ ਤੋਂ ਪਹਿਲਾਂ ਸਹੁੰ ਖਾਧੀ ਸੀ ਕਿ ਮੈਂ ਤੁਹਾਡੇ ਸਾਰਿਆਂ ਦੇ ਨਾਲ ਹਾਂ ਅਤੇ ਨਿਰਪੱਖ ਰਹਾਂਗਾ ਪਰ ਅੱਜ ਉਸ ਨੇ ਗਲਤ ਪ੍ਰਕਿਰਿਆ ਦਾ ਸਮਰਥਨ ਕਰਕੇ ਪ੍ਰਧਾਨ ਦਾ ਅਹੁਦਾ ਹਾਸਲ ਕਰਕੇ ਸਾਡੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਈ ਹੈ |

ਸਾਬਕਾ ਬਲਾਕ ਪ੍ਰਧਾਨ ਸਰਦਾਰ ਜੁਗਿੰਦਰ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਨੇ ਪਹਿਲੀ ਵਾਰ ਦੇਖਿਆ ਹੈ ਕਿ ਇਸ ਤਰ੍ਹਾਂ ਵੀ ਧੋਖਾਧੜੀ ਹੁੰਦੀ ਹੈ। ਉਨ੍ਹਾਂ ਕਿਹਾ ਕਿ ਅਸੀਂ ਅਧਿਕਾਰੀਆਂ ਨੂੰ ਕਾਫੀ ਬੇਨਤੀ ਕੀਤੀ ਕਿ ਬੈਲਟ ਪੇਪਰ ‘ਤੇ ਚੋਣਾਂ ਕਰਵਾਈਆਂ ਜਾਣ ਪਰ ਉਨ੍ਹਾਂ ਨੇ ਸਾਡੀ ਗੱਲ ਨਹੀਂ ਸੁਣੀ।

ਦੂਜੇ ਪਾਸੇ ਨਵਨਿਯੁਕਤ ਪ੍ਰਧਾਨ ਹਰਬੰਸ ਸਿੰਘ ਚੁੱਘ ਨੇ ਕਿਹਾ ਕਿ ਜਦੋਂ 13 ਅਤੇ 14 ਦੇ ਅੰਕੜੇ ਹੋਣ ਤਾਂ ਵਿਰੋਧ ਹੋਣਾ ਸੁਭਾਵਿਕ ਹੈ।ਉਨ੍ਹਾਂ ਕਿਹਾ ਕਿ ਸਾਡੇ 14 ਡਾਇਰੈਕਟਰਾਂ ਨੇ ਹਲਫੀਆ ਬਿਆਨ ਲਿਖ ਕੇ ਸਾਨੂੰ ਵੋਟਾਂ ਪਾਈਆਂ ਹਨ। ਜਦੋਂਕਿ ਵਿਰੋਧ ਕਰ ਰਹੇ ਡਾਇਰੈਕਟਰਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ 14 ਹਲਫ਼ਨਾਮੇ ਜਾਅਲੀ ਹਨ ਅਤੇ ਉਨ੍ਹਾਂ 14 ਹਲਫ਼ਨਾਮਿਆਂ ਵਿੱਚੋਂ ਇੱਕ ਨੇ ਹਲਫ਼ਨਾਮਾ ਵਾਪਸ ਲੈ ਲਿਆ ਸੀ ਅਤੇ ਸਿਰਫ਼ 13 ਡਾਇਰੈਕਟਰਾਂ ਨੇ ਹੀ ਪ੍ਰਧਾਨ ਅਤੇ ਬਾਕੀ ਅਹੁਦਿਆਂ ਦੀ ਚੋਣ ਕੀਤੀ। ਜਦਕਿ ਦੋਨੋ ਧਿੜਾਂ ਦਾ ਸਮਰਥਨ ਬਰਾਬਰ ਸੀ।

ਚੁਣੀ ਗਈ ਕਮੇਟੀ ਦੇ ਮੈਂਬਰ

ਸ: ਹਰਬੰਸ ਸਿੰਘ ਚੁੱਘ, ਪ੍ਰਧਾਨ

ਸ: ਅਮਰਜੀਤ ਸਿੰਘ, ਜਰਨਲ ਸਕੱਤਰ

ਮਾਤਾ ਕਮਲੇਸ਼ ਕੌਰ, ਮੀਤ ਪ੍ਰਧਾਨ

ਸ: ਹਰਭਜਨ ਸਿੰਘ ,ਸਚਿਵ